پریشان ہونا چھوڑ دیں ورنہ بیماریاں لگ سکتی ہیں

تناؤ جسمانی یا ذہنی دونوں طرح کی صحت پر منفی اثرات مرتب کرتا ہے اور آج کی دنیا میں اکثر افراد زندگی کی الجھنوں میں پھنسے رہتے ہیں۔ مگر کیا آپ کو معلوم ہے کہ بظاہر بے ضرر نظر آنے والا تناؤ کن بیماریوں کا باعث بنتا ہے؟

بالوں کا گرنا

روزانہ کچھ بال گرنا عام بات ہوتی ہے مگر ذہنی تناؤ اس عمل کو متاثر کرتا ہے۔ بہت زیادہ تناؤ کی صورت میں بڑی تعداد میں بال گرنا شروع ہو جاتے ہیں اور گنج پن کا خطرہ بڑھ جاتا ہے۔ ایک تحقیق کے مطابق تناؤ کی وجہ سے جسم کا دفاعی نظام ہی بالوں کے غدود پر حملہ آور ہو جاتا ہے جس کے نتیجے میں بال تیزی سے گرنا شروع ہو جاتے ہیں۔

ذہنی امراض

تناؤ ذہنی طور پر بھی بیمار کر سکتا ہے، ہارمون کورٹیسول کی مقدار میں اضافہ توجہ مرکوز کرنے کی صلاحیت کو متاثر کر سکتا ہے، جبکہ یادداشت کے مسائل سمیت ذہنی بے چینی یا ڈپریشن کا بھی خطرہ ہوتا ہے۔ 

کیل مہاسے

اگر آپ کا خیال ہے کہ کیل مہاسے نوجوانی کا بھیانک خواب ہے تو یہ غلط ہے، ذہنی تناؤ ، کیل مہاسوں کو کسی بھی عمر میں چہرے پر نمودار کر سکتا ہے۔ ذہنی تناؤ کے شکار افراد میں ہارمونز کی مقدار بڑھتی ہے جو جلدی غدود کومزید تیل خارج کرنے پر مجبور کرتی ہے۔ یہ اضافی آئل بالوں کے غدود میں مٹی اور جلد کے مردہ خلیات کے ساتھ پھنس جاتا ہے جس کے نتیجے میں مہاسے نمودار ہوجاتے ہیں۔ 

ہر وقت نزلہ زکام

ذہنی تناؤ، جسمانی دفاعی نظام کی کارکردگی متاثر کرتا ہے جس کے باعث ہر وقت بیماری کا خطرہ زیادہ اور جراثیموں سے بچنا مشکل ہو جاتا ہے۔ ایک تحقیق کے مطابق تناؤ کا شکار لوگ زیادہ بیمار ہوتے ہیں۔ خاص طور پر نزلہ، زکام یا فلو وغیرہ کا خطرہ زیادہ ہوتا ہے ۔ 

معدے کے مسائل

ذہنی تناؤ کے نتیجے میں جسم میں ڈائجسٹ و ایسڈ زیادہ بننے لگتا ہے جو سینے میں جلن کا باعث بنتا ہے، اسی طرح یہ معدے میں موجود خوراک کی صفائی کا عمل بھی سست کر دیتا ہے جس کے نتیجے میں گیس اور اپھار پیدا ہوتا ہے ۔ کئی بار تو یہ آنتوں کی سرگرمیوں کو بڑھا کر ہیضے کا بھی باعث بن جاتا ہے۔ 

سردرد رہنا

اگر کسی کو سردرد نہیں ہوتا مگر اچانک سر میں تکلیف مسلسل رہنا شروع ہو گئی ہے تو وہ بہت زیادہ تناؤ کا شکار بھی ہو سکتا ہے۔ تناؤ ایسے کیمیکلز خارج کرتا ہے جو اعصاب اور دماغ میں خون کی شریانوں میں تبدیلیاں لاتے ہیں جس سے سردرد مستقل مہمان بن جاتا ہے، اگر کسی کو آدھے سر کا درد رہتا ہے تو تناؤ اسے بدترین بنادے گا۔ 

جسمانی وزن میں اضافہ یا کمی

تناؤ ایک ہارمون کورٹیسول کے زیادہ اخراج کا باعث بنتا ہے جو جسم کی بلڈ شوگر پراسیس کرنے کی صلاحیت پر اثرات مرتب کر کے چربی، پروٹین اور کاربوہائیڈریٹس کو ہضم کرنے کے طریقہ کار میں تبدیلیاں لاتا ہے جس سے وزن میں اضافہ یا کمی ہونے لگتی ہے۔ تناؤ لوگوں کو غیرصحت مند سرگرمیوں کے لیے بھی اکساتا ہے جیسے زیادہ کھانا یا معمول سے بہت کم کھانا۔

عادل آفتاب

 

Visit Dar-us-Salam Publications
For Authentic Islamic books, Quran, Hadith, audio/mp3 CDs, DVDs, software, educational toys, clothes, gifts & more... all at low prices and great service.